حكاية بنّوة صغرونة

هاذي حكاية بنّوة صغرونة
إسْمها ميمونة
لابسة روبة حمراء تحفونة
ديما في يدّها عروسة
تحبْ تطير كيما العصفورة
تجري من غيمة لغيمة
تشِدْ نجمة و تزيّنها في شعرها
تتشعبط في القمرة
تسْرق منها نورها و زينها
تتبسّم من قلبها
و خوصة الزّين تظهر على خدّيها
تذبّل عينيها و تقول:
ولّيت أزين منك !


ميمونة
تحِبْ تلعب تحت المطرْ
هي تفرحْ كي تصبْ المطرْ
تغافل أمّها و تخْرج مالدّار تغنّي
تُغطُسْ في الطّبعة بسْوِيقاتها
تشِدْ خيوط المطر بيديّاتها
الفرحة تتكلّم في عويناتها


ميمونة
تحِبْ تاخو مالوردة ريحتها
مالفراشة لونها و خِفّتْها
مالتّفاحة حموريّتْها بشْ تزيّن خُدّيها
مالحمامة بيوضيّة ريشها
مالغزالة قدّها و زينها


ميمونة
تحِبْ تجيها كيما سندريلا الجِنيّة
بعصاها السحريّة
تلبّسها أحسن روبة و تركبّها في كرّوسة
تهِزّها وين أميرها الصّغرون يستنى فيها
بحصانو الابيض يطير بيها
و في جزيرة الأحلام عرّس بيها
هي تحِبو و هو يحِبّها