ليلة من ليالي ديسمبر

المطر تجْبدْ
رعدْ
برقْ
الشّارع فارغ
لا قطاطسْ و لا فيران
الدّنيا باردة
الدنيا دحْسة
ليلة من ليالي ديسمبر


الزّوزْ راقدين
كل واحد على جرّاية
مطغطّي بفرّاشية
الكانون بحذاهم
الماء يقطّر مالسقفْ
راقدين
زعْمة فاشْ يحلمو ?


حسّ كرهْبة وقْفِتْ قدّام الدّار
حسّ تسْكير بيبان
حسّ توشْويشْ


"بسم اللّه المانع الستّار
شفمّا ? شفمّا ?
شكون ?
يا لطيف !"


دَزُّوا البابْ !
خلعوه!
حسّ ماعون تكسّر
......
بداوْ يقْربوا
......



شْفمّا ?
شكون?
الزّوز خايفين
هي تبكي جرات لحُضْنو
شَدّلها يدّها
هو....
مايعْرَفِشْ شنوة يِسْتنّى فيه !



شْكونهم ?
عبادْ !
خسارة فيهم كلمة عبادْ !
أربعة و لا خمسة
ما نعرفِشْ بالضّبطْ


دزّوها على الحيط
ضربوه بالصبّاط على وِجْهو
دمّْ
هي تعيّط و تبكي
هو ماهو فاهم شيْ



طَيْحوه في القاعة
سَبُّوه
ضَربوه
شعْرة لقتلوه
هو ساكت
كايّنو موشْ قاعَدْ يحِس!



" سَيْبولي وَلْدي ! سَيْبولي وَلْدي !
بِشْ تُقْتلوه !
يا ناس إجْريوْلي !
ضرْبوها بكفْ
طيْحوها
طاحِتْ على ظهرْها
ظهرْها إلّي تقَوّسْ مالخِدْمة في السّواني



لابْسين بالأكحِلْ
وجوهمم ملثْمّة
ما ترى كان عينيهم
كان الشّرْ في عينيهم
شكونهم ?
عبادْ!
خسارة فيهم كلمة عبادْ !



سبّوه
ضرْبوه
ضرْبوه
قريبْ لقَتْلوه
كرْكروه من ساقيه
خرجِتْ وراهم
حفيانة
تبكي و تصيح
المطر قوات
رعد
برق



" يا وْليدي وين بِشْ يهِزّوك ?
ياوْليدي آشْ عملت من عمْلة ?
سَيْبولي وِلْدي !
رَجعولي ولدي" !



"يامّي ما عملت شيْ
لا سرِقتْ
و لا خطفِت
و لا قتلتْ
ما تِبْكيشْ يامّي
دموعكْ غالية
ما توَرِهُمِشْ دموعِكْ
ما تِبكيشْ"



"يا وْليدي لشْكونْ خلّيتني ?
لا أهل و لا مّالي !
إنتِ نوّارة عيني
ماعندي حَدْ غيركْ
سَيْبولي وِلْدي ! رَجعولي ولدي" !



"يامّي وِلْدِكْ راجِلْ
ما تِبكيشْ علِيّا
ما تْخافِشْ عليّا
أتَوْ نرْجَعْ
أتَوْ نرْجَعْ
كان مَرْجعتشْ ..... "



"لا لا لا
سَيْبولي وِلْدي !
رَجعولي ولدي
لوينْ بِشْ تهزّوه ?
آشْ حاشْتكمْ بيه?
وليدي ملايْكة
راكم غالطين فيه
رَجعولي ولدي !
نحِبْ ولدي !
ماعنْدي كان هو !
حرام عليكم
عِرْسو الجمعة الجاية
مازال كي شَدْ خِدمة!
حرام عليكم
رَجعولي ولدي !"

دزّوه
ركّبوه في كرهبة
دزّوها
طاحت في الماء
المطر تصُبْ
برق
رعدْ



تجري
تجري
تصيح
تبكي
تطيح
تقوم
تجري
الكرهبة بِعدِتْ ....



المطرتصٌب
برق
رعد
ليلة من ليالي ديسمبر